Trahedya ang nahitabo sa Alicia, Bohol human usa ka 48-anyos nga lalaki ang namatay samtang 13 ka uban pa ang naangol sa karambola nga nalambigit ang Ceres Bus, tourist van ug usa ka motorsiklo kagahapon, Hunyo 25, 2026.
Sumala sa imbestigasyon sa kapulisan, naglingkod lamang ang biktima sa iyang giparkingan nga motorsiklo samtang naghulat sa iyang asawa sa dihang nagpadulong ang Ceres Bus ngadto sa iyang dapit ug mibangga kaniya. Giklaro sa mga otoridad nga dead-on-the-spot ang biktima.
Nasayran nga ang Ceres Bus padulong unta sa Candijay sa dihang nabanggaan kini sa usa ka tourist van sa intersection sa Barangay Poblacion. Ang van gikan sa Barangay Luan ug paingon unta sa Chocolate Hills sa Carmen alang sa usa ka tour.
Naangol usab ang drayber ug konduktor sa bus, usa ka pasahero niini, ang drayber sa tourist van, ug ang 11 ka sakay niini. Gidala silang tanan sa Don Emilio del Valle Memorial Hospital sa Ubay, Bohol aron matambalan.
Giandam na sa kapulisan ang pagpasaka og kasong Reckless Imprudence Resulting in Homicide batok sa drayber sa Ceres Bus ug Reckless Imprudence Resulting in Multiple Physical Injuries batok sa drayber sa tourist van, samtang padayon pa ang imbestigasyon sa maong aksidente.
I via Renante Socia Lada