Gipirmahan ni Cebu Governor Pamela Baricuatro ang Executive Order No. 35 nga nagmugna sa Cebu Safe Schools Program, usa ka programa nga tumong sa pagpalig-on sa kaluwasan sa tanang pampubliko ug pribadong eskwelahan sa tibuok lalawigan sa Sugbo. Ang programa nagtumong usab sa pagpugong sa mga insidente sa kapintas ug pag-andam sa mga eskwelahan batok sa mga emerhensya.
Ubos sa maong executive order, ipatuman ang usa ka komprehensibong sistema aron mapanalipdan ang mga estudyante, magtutudlo ug ubang kawani sa eskwelahan. Lakip niini ang pagpalig-on sa child protection, mental health support, disaster preparedness, ug mas paspas nga pagtubag sa mga emerhensya pinaagi sa panagtinabangay sa gobyerno, kapulisan, mga ginikanan ug komunidad. Gitukod usab ang Cebu Safe Schools Committee (CSSC) nga gipanguluhan ni Gov. Baricuatro isip chairperson ug ni DepEd Cebu Province Schools Division Superintendent Dr. Senen Priscillo Paulin isip vice chairperson.
Kabahin usab sa komite ang mga opisyal sa Capitol, Cebu Provincial Police Office, mga representante sa PTA, mga magtutudlo, ug pribadong sektor aron magdumala sa mga polisiya ug programa alang sa kaluwasan sa mga eskwelahan. Sulod sa 90 ka adlaw, pagahimoon sa komite ang Cebu Safe Schools Plan nga maglatid sa mga sumbanan sa school safety, risk assessment, emergency preparedness, mental health programs, violence prevention, crisis communication, ug pondo alang sa implementasyon sa programa.
Gimando usab ang regular nga fire, earthquake ug lockdown drills, kontroladong pagsulod sa mga bisita, ug kada tuig nga safety assessment sa matag eskwelahan. Ang executive order epektibo dayon human kini mapatik ug nagmando sa tanang opisina sa Provincial Government ug mga local government units sa Sugbo nga motuman ug motabang sa pagpatuman sa Cebu Safe Schools Program aron masiguro ang luwas, malinawon ug angay nga palibot sa pagkat-on alang sa tanang estudyante ug kawani sa mga eskwelahan.
📸 Cebu Province I via Renante Socia Lada