Namatay ang usa ka 10 anyos nga batang lalaki human malumos sa baybayon sa Barangay Ibo, Toledo City, alas 4:20 sa hapon sa Disyembre 27, 2025.
Ang biktima giila sa kapulisan na mao si James Clyde Rico Mejias, Grade 5 nga estudyante, residente sa Sitio Canggansi, Barangay Landahan, Toledo City.
Sumala sa inisyal nga imbestigasyon sa Toledo City Police Station, personal nga mi-report ang amahan sa biktima alas 7:50 sa gabii mahitungod sa insidente.
Base sa pamahayag sa amahan, migawas sa ilang panimalay ang bata nga walay pagtugot ug mipadulong sa baybayon. Alas 3:20 sa hapon, gipahibalo siya sa stepbrother sa biktima, nga si Noah, nga ang bata nakit-an nga naglutaw na nga wala nay kinabuhi daplin sa baybayon sa Barangay Ibo.
Nasuta usab nga sa buntag sa maong adlaw, gisugo sa amahan ang bata nga magsag-ob og tubig. Human niini, nangayo og pagtugot ang biktima nga mopalit og short pants isip regalo sa Pasko. Sa paggawas sa amahan sa balay, gituohang mipadayon ang bata sa iyang lakaw, ug uban sa iyang half brother ug kamagulangang igsoon nga babaye, mipadulong sa baybayon aron maligo, apan didto na kini nalumos.
Miresponde ang mga personnel sa City Disaster Risk Reduction and Management Office (CDRRMO) ug gidal-a ang biktima sa Toledo City Hospital, apan gideklarar nga dead on arrival sa mga doktor.
Padayon ang imbestigasyon sa kapulisan aron matino ang tanang detalye sa insidente. Samtang, gipahinumduman ang mga ginikanan ug tigbantay nga mas hugot bantayan ang mga bata, ilabi na duol sa baybayon ug katubigan, aron malikayan ang susamang trahedya.
Source: Toledo City Police Station
I via Renante Socia Lada