Nikalas ug usa ka kinabuhi ang pagkadisgrasya sa usa ka Mini Dump truck, dihang matud pa nawad an og brake ug wala na makontrolar sa nagmaneho niini hinungdan nga nalahos ug tagak kini sa bung-aw sa Purok Maria Clara, Barangay Lamac, lungsod sa Pinamungajan Cebu niadtong Agosto 17, 2024.
Sa gihimong imbestigasyon sa kapulisan ang truck gimaneho ni Michael Bastida og adunay 9 ka mga pasahero nga nag-byahe gikan sa Linao, Cantabaco, Toledo City paingon sa lungsod sa Dumanjug apan pag-abot nila sa nahisgutang lugar, samtang nagdulhog kalit nga nibasiyo ang brake sa truck hinungdan nga wala na makontrol ug nalahos kini ngadto sa bung-aw.
Ang mga biktima kansang pulos nag trabaho sa usa ka construction company giila nga sila si Junrey Pasignasigna, Randy Pasignasigna, Juriden Pasignasigna, Josephen Bonbon, Ian James Verano, Jimmy Gasper, ug Lance Balocos Canasa, ug si Jerome Pasignasigna kinsa gikuhaan sa iyang kinabuhi atol sa insidente.
Samtang ang drayber mag atubang sa kasong reckless imprudence resulting to homicide, multiple physical injuries ug damage to property. (TJP & Renante Lada)