Dako ang kalipay ug pasalamat sa mga kabanay ug pamilya sa nalunod nga pumpboat didto sa kadagatan sakop sa lungsod sa Sibonga, Sugbo, kagabii, Hunyo 20, 2024, kay pulos sila naluwas.
Ang mga biktima mao sila si: Federico Flores, 72 anyos ang panuigon, Desiderio Flores, 42 anyos, Devonne Flores, 15 anyos, Dereck Flores, 16 anyos, Sarah Sacedon, 48 anyos, ug Atis Flores, 78 anyos ang pangidaron, Pulos sila taga Barangay Mantatao, lungsod sa Calape, Bohol.
Nasayran nga pasado alas 6:0O kagabii naglawig ang maong pumpboat paingon sa Bohol apan tungod sa dautang panahon nalunod kini.
Daling nirespondi ang mga sakop sa Philippine Coast Guard Substation sa Sibonga, Mananagat, BFP, ug MDRRMO sa Sibonga sa maong aksidenti.
Sa imbistigasyon sa Sibonga Police Station nasayran nga igo lang unta nitambong sa lubong ang mga biktima sa ilang kaliwat nga namatay didto sa lungsod sa Sibonga apan sa ilang pagbalik nakasugat sila og dagkong bawod na maoy hinugdan nga nalunod ang ilang gisakyan.
Sa pagkakaron nakauli na ang mga biktima didto sa ilang lugar sa Bohol. (Renante Lada | Ting Joe Pepito)