Daghang mga patay nga gagmay nga isda ang nadiskubrehan sa kabaybayonan sa Bogo City sayo sa buntag sa Oktubre 13, 2025. Ang panghitabo nakapatingala ug nakapahadlok sa mga residente nga dali usab nga mi-report sa mga otoridad.
Matod sa mga residente, nakita nila ang mga isda nga nagtapok ug naglutaw sa daplin sa dagat. Tungod niini, migawas ang pangagpas nga basin adunay kalabutan kini sa 5.8-magnitude nga linog nga mitay-og sa amihanang bahin sa Sugbo niadtong miaging adlaw.
Gipasabot sa mga residente nga naglaum sila nga motabang ang Bureau of Fisheries and Aquatic Resources (BFAR) sa pag-imbestigar aron masuta kung kontaminado ba ang tubig o kung adunay kalit nga pagbag-o sa kondisyon sa dagat nga maoy hinungdan sa kamatayon sa mga isda.
Sa video nga gi-post ni Jad Tabora, makita ang daghang patay nga isda nga nagkatag sa baybayon. Daghang netizen usab ang nagpadayag sa kabalaka ug nanawagan sa mga otoridad nga buhaton ang angay aron malikayan nga mausab ang susamang insidente.
I via Renante Socia Lada