Nagpadayon sa ilang normal nga operasyon ang mga ospital sa amihanang bahin sa probinsya sa Cebu bisan pa sa bag-ong linog, apan nagpabilin kini sa heightened alert status sumala sa pinakabag-ong update alas 9:00 kagabii, Abril 6, 2026.
Matud pa ni Capitol Piso Health Consultant Dr. Elise Nicole Catalan, padayon nga gimonitor pag-ayo ang kahimtang sa mga health facilities ilabina kadtong nahimutang duol sa mga fault line ug sa northern corridor.
Sa Cebu Provincial Hospital (CPH) sa siyudad sa Bogo, dali nga gipatuman ang mga safety protocol human sa inisyal nga assessment nga gihimo sa City of Bogo Office of the Building Official (OBO). Nasuta nga gamay ra o halos walay non-structural damage sa pasilidad.
Sumala ni Dr. Z. Yurango, Chief of Hospital, ilang giandam ang mga pasyente pinaagi sa pagbalhin niini ngadto sa mga hallway aron mas sayon ang posibleng evacuation kung adunay kusog nga aftershock.
Samtang, walay namatikdang structural damage sa Sogod District Hospital.
Wala usab may nahitabong insidente sa Tuburan District Hospital, Bantayan District Hospital, ug Daanbantayan District Hospital, ug nagpabilin nga normal ang ilang serbisyo ug stable ang mga lifeline.
Gimando-an usab ni Governor Pam Baricuatro ang Provincial Engineering Office sa pagconduct og dugang nga assessment aron masiguro ang kalig-on sa istruktura sa mga pasilidad.
Mahinumduman, pasado alas 3:22 kagahapon sa hapon nakatala ang PHIVOLCS ug magnitude 5.4 nga nasinati sa mga lugar sa Sugbo ug silinganan nga probinsya. Ang epicenter niini didto sa Bogo City.
Sa pagkakaron, padayon nga nagbantay ang Provincial Government sa sitwasyon aron masiguro ang ka-andam sa tanang ospital sa mga apektadong lugar.
Source: DRRM-H Focal, CPH Bogo
I via Renante Socia Lada