Gipangandaman dayon sa Talisay City Government ang mga pamilya nga naapektuhan sa sunog sa San Lucas, Barangay Biasong, Talisay City kagabii, Septiyembre 20, 2026.
Sumala kang Talisay City Mayor Samsam Gullas, misaka sa ikatulong alarma ang sunog sa wala pa kini makontrol alas 7:54 sa gabii ug hingpit nga napalong alas 8:23. Gipadala dayon ang mga personnel sa City Hall ug mga responder aron motabang sa mga apektadong pamilya.
Temporaryong gihimutang ang mga fire victims sa Pooc Gym ug Biasong Gym, diin giandam ang mga tent ug basic needs. Maghatag usab ang City Government og libreng pamahaw, paniudto ug panihapon, ingon man sleeping kits, dining kits, hygiene kits ug kitchen utensils.
Matud ni Mayor Gullas, hatagan usab og pinansyal nga tabang ang mga naapektuhan ug makig-coordinate ang city government sa opisina ni Cong. Rhea Gullas alang sa dugang suporta. Andam usab ang mga social worker alang sa psychosocial assistance, samtang tabangan sa CSWDO ang mga nanginahanglan og tambal pinaagi sa partner pharmacies.
Gipasalamatan ni Mayor Gullas ang Talisay BFP, City DRRMO, mga barangay officials, volunteers ug responders sa ilang dali nga pagresponde. Matud niya, prayoridad sa city government ang kaluwasan ug mga panginahanglan sa matag pamilyang naapektuhan sa sunog.
Sa pagkakaron padayon nga gitino ang himungdan sa sunog, mga biktima ug danyos niini.
I via Renante Socia Lada