Nagpadayon ang search, rescue, ug retrieval operations sa Binaliw landfill landslide human mipahibalo ang mga rescuer nga posibleng adunay lima ka dugang nga lawas nga namatikdan sa likod ug atubangan nga bahin sa landslide area. Bisan pa sa hulga sa kaluwasan ug lisod nga kahimtangan sa yuta, padayon gihapon ang operasyon aron makit-an ang tanang biktima.
Gikumpirmar sa mga otoridad nga duha pa ka lawas ang narekober niadtong alas 4:00 sa hapon niadtong Martes, nga nagpasaka sa total nga nakumpirmar nga namatay ngadto sa 13. Ang mga narekober nga lawas dali nga gidala alang sa husto nga pag-ila ug dokumentasyon.
Ang pinakabag-ong nailhang mga biktima mao si Susan Marikit, 47 anyos, babaye ug residente sa Panoypoy, Consolacion, nga narekober niadtong Enero 13, 2026 alas 1:49 sa hapon. Lakip usab si Jonel Mabatid, 33 anyos, lalaki ug residente sa Binaliw, Cebu City, nga narekober niadtong alas 3:50 sa hapon sa samang adlaw.
Sumala sa pinakabag-ong report, 18 ka indibidwal ang naluwas apan nagkadaiyang angol ang naangkon. Usa sa mga biktima ang nagka-pneumonia samtang usa pa ang anaa sa kritikal nga kahimtangan ug padayon nga ginabantayan sa mga doktor.
Sa laing bahin, 23 ka tawo ang gihapon gitaho nga missing. Tungod niini, gipakusog pa sa mga rescue teams ang ilang operasyon bisan pa sa peligro sa posibleng dugang nga pagdahili sa basura. Nagpadayon usab ang panawagan sa mga otoridad sa publiko alang sa kooperasyon ug pag-amping sa palibot sa landslide area.
I via Renante Socia Lada