Mihimo dayon og aksyon ang Poro Municipal Police Station human madawat ang report bahin sa ilegal nga pagputol sa mga kahoy nga lubi ilalom sa OPLAN KALIKASAN sa alas 3:30 sa hapon, Enero 26, 2026, sa Sitio Can-Usay, Brgy. Eastern Poblacion, Poro, Cebu.
Ang mga responding police personnel uban ang representante sa Philippine Coconut Authority (PCA) miadto dayon sa maong lugar ug nakit-an ang mga kahoy nga lubi nga naputol ug gibiyaan. Sa initial nga imbestigasyon, nasuta nga nangikyas ang mga suspek pagkabati sa pag-abot sa kapulisan.
Kapin sa 48 ka buok sa kahoy nga lubi nga adunay gibanabana nga bili nga ₱10,103.00 ang narekober ug gidala sa Poro Municipal Police Station alang sa hustong disposisyon. Ang mga molupyo sa duol nga lugar wala mipadayag og impormasyon kabahin sa mga suspek.
Sumala ni PCOL Abubakar Udang Mangelen Jr., Provincial Director sa Cebu Police Provincial Office (CPPO), padayon ang paningkamot sa kapulisan sa pagpanalipod sa kinaiyahan.
Matud pa niya, dili tugotan ang ilegal nga pagputol sa kahoy ug gihangyo ang publiko nga makigtabang sa pagreport sa mga paglapas sa balaod nga may kalabutan sa kalikupan.
Padayon pa ang imbestigasyon sa maong kaso ug magpadayon usab ang mga operasyon ilalom sa OPLAN KALIKASAN aron mapugngan ang mga ilegal nga kalihokan nga makadaot sa kinaiyahan.
Source: CPPO
I via Renante Socia Lada