Usa ka trabahante sa semento ang namatay human mitakilid ug nakulob ang cargo ship nga MV Theresa I sa APO Cement Port sa Naga City, Cebu sa miaging adlaw.
Sumala sa Philippine Coast Guard District Central Visayas, nagkarga pa og semento ang barko sa pantalan sa dihang kalit kining mitakilid samtang nag-de-ballasting, nga hinungdan sa insidente.
Usa sa mga crew sa makina ang na-trap sulod sa engine room apan naluwas human sa kapin tulo ka oras nga rescue operation. Ang tanang 19 ka tripulante sa barko luwas nga napagawas.
Apan usa ka cement handler nga naa sa gawas sa barko ang naigo sa naputol nga mooring line. Dali siyang gidala sa ospital apan gideklarar nga patay pag-abot.
Nagbutang usab og oil spill boom ang mga responder aron malikayan ang posibleng polusyon sa dagat. Mitabang sa rescue operation ang Naga City Disaster Risk Reduction and Management Office ug ang kompanya nga APO Cement.
Source: PCG
I via Renante Socia Lada