Ang Cebu mag-host sa 20th National Convention of Lawyers, nga ipahigayon sa Enero 30 hangtod Pebrero 1, 2025, sa Waterfront Cebu City Hotel & Casino.
Gipahibalo kini ni Integrated Bar of the Philippines (IBP) National President Atty. Antonio Pido ug Executive Vice President Atty. Allan Panolong atol sa ilang pagbisita sa Kapitolyo ug pagdapit kang Gobernador Gwen Garcia nga moapil sa maong okasyon.
Gikataho nga kapin sa 4,000 ka abogado gikan sa gobyerno ug pribadong sektor ang motambong sa biennial nga kalihokan. Ang mga partisipante makakuha og 18 MCLE (Mandatory Continuing Legal Education) units ug matuman ang usa sa lima ka kinahanglanon nga pag-apil sa national o regional conventions alang sa lifetime membership sa IBP.
Ang MCLE usa ka rekisito sa mga abogado aron magpabiling updated sa balaod ug jurisprudence, masiguro ang ethical standards sa propesyon, ug mapalambo ang kalidad sa ilang serbisyo.
Ang Supreme Court, nga gipanguluhan ni Chief Justice Alexander G. Gesmundo, mopreside sa opening day uban sa daghang mga Justices nga mahimong MCLE lecturers.
Si Secretary Christina Garcia-Frasco, usa usab ka abogado, gi-forecast nga motambong.
Matud ni Gov. Gwen Garcia, nalipay siya nga ang IBP nipili sa Cebu isip venue sa maong dako nga kalihokan. Iyang gipadayag nga kini dako og benepisyo alang sa mga negosyo sa probinsya ug andam ang Kapitolyo nga mosuporta aron masiguro ang kalampusan sa programa.
Ang 20th National Convention of Lawyers naghatag og oportunidad sa mga abogado nga magtinabangay, magtuon og bag-ong kaalam, ug magpalig-on sa ethical standards sa legal profession. (Renante Socia Lada)
(Source: Cebu Provincial Capitol PIO)