Ang lokal nga kagamhanan sa dakbayan sa Mandaue makig alayon sa NBI kalabot sa nasakmit nga Uranium.
Ang imbestigasyon sa nasakmit nga uranium gikan sa operasyon sa Pasay, Cagayan de Oro, ug Mandaue City nagpadayon pa karon. Giklaro sa mga opisyal sa Mandaue nga ang radioactive material nga narekober wala sa siyudad apan nasakmit kini sa lain-laing lugar ug gipasa lang ngadto sa otoridad alang sa pagproseso.
Si Mayor Glenn Bercede nag-awhag sa mga otoridad sa mas lawom nga imbestigasyon ug mas hugot nga pag-monitor sa posibleng pagsulod sa uranium sa Mandaue.
Nagpahimangno siya nga delikado ang uranium ug posibleng magdala kini og kadaot sa kahimsog ug kalikopan kung kini masulod sa siyudad.
Ang National Bureau of Investigation (NBI) ug ang Philippine Nuclear Research Institute (PNRI) nagtinguha nga masuta kung asa gikan ang uranium ug ang tuyo niini sa nasakmit nga iligal nga operasyon. Ang mga suspek nga nalambigit ani nga kalihukan kasamtangang gipailalom sa proseso sa balaod pinaagi sa paglapas sa Republic Act No. 5207 (Atomic Energy Regulatory and Liability Act). (Renante Socia Lada)
(Source: Mandaue City PIO)