Napalgan nga wala nay kinabuhi ang usa ka mananagat sa batoon nga bahin sa kabaybayunan sa Barangay Punta Engaño, Lapu-Lapu City, pasado alas 9:00 sa buntag, Disyembre 19, 2024.
Ang biktima mao si Nestor Banson, 64-anyos, ug residente sa Barangay Maslog, Danao City. Nakumpirma ang iyang pagkatawo pinaagi sa iyang asawa nga si Veronica, nga personal nga nitan-aw sa lawas human makadungog sa balita.
Matod ni Veronica, niingon ang iyang bana nga managat kini sa kadagatan sa Liloan aron mangyawat og isda nga ibaligya alang sa bunyag sa ilang apo sa umaabot nga Disyembre 29, 2024.
Sa wala pa mogikan, nangayo pa si Nestor og tambal kay naglain ang iyang pamati tungod sa dugay nang gihambin nga high blood.
Sa pasiunang imbestigasyon sa kapulisan posibli nga si Nestor giatake sa iyang sakit samtang nanagat, hinungdan sa iyang pagkalunod.
Ang maong insidente nagpakita sa peligro nga giatubang sa mga mananagat matag adlaw. Ang lokal nga awtoridad nag-awhag sa mga mananagat nga magdala ug saktong kagamitan o tambal panahon sa pagpanagat. (Renante Socia Lada)