Usa ka magtutudlo sa Lawaan Elementary School nga si Melanie Lee Lastimosa, 43 anyos, ang napatay human gidunggab sa makadaghan sa iyang kanhi nga ka-live-in nga si Katherine “Jack” Retita, 42 anyos, didto sa ilang balay sa Barangay Tubod, Minglanilla, Oktubre 6, 2025.
Sumala sa imbestigasyon sa kapulisan, buwag na ang duha tungod kay aduna daw bisyong drogas ang suspek. Apan anang gabii, hubog ug giingong high sa drogas si Retita ug misulod sa balay sa biktima ug nag-away sila.
Giingon nga nagpaka-aron-ingnon ang suspek nga napaakan siya ug bitin aron pasudlon siya pagbalik sa balay. Apan pagkasulod niya, mikalit kini og dunggab sa biktima sa makadaghan nga hinungdan sa iyang kamatayon.
Ang mga kauban sa biktima sa eskwelahan miingon nga malipayon pa nila nga nakauban si Ma’am Melanie sa World Teachers’ Day, ug wala nila damha nga maoy kataposang higayon nga ilang makuyog siya.
Human sa hitabo, nitago ang suspek sa iyang kwarto apan nadakpan gihapon sa kapulisan. Nakaplagan usab ang duha ka kutsilyo nga gigamit sa krimen. Karon, mag-atubang siya og kasong murder, samtang ang pamilya sa biktima naningkamot nga makab-ot ang hustisya alang sa ilang igsoon nga maestra nga buotan ug maayong tao.
I via Renante Socia Lada