Gipahigayon sa LGU Barili, kauban si Hon. Wilden S. Saban, Kapitan sa Barangay Mantalongon, ang usa ka inspeksyon sa Greenbelt Subdivision Project sa Sitio Caugsulan, Barangay Mantalongon. Ang proyekto, nga sa unang higayon gi-market sa Landworld Corporation ug karon naila na nga Planetarianz Realty Inc., gisusi human gipagawas sa Department of Human Settlements and Urban Development (DHSUD) ang Cease-and-Desist Order (CDO) ug Notice of Violation (NOV) niadtong Agosto 7, 2025.
Sa pagsusi, nasayran nga wala gyud masugdi ang development sa maong lugar. Ang tibuok area gitabonan na sa kogon ug hagonoy ug gilibutan lang og kural, nga nagpakita nga walay kalihokan nga nahimo gikan sa developer.
Gituhuan usab nga ang kompanya mibaligya og lote nga walay License to Sell ug Certificate of Registration, ug nag-advertise pa gyud sa proyekto walay pagtugot gikan sa Munisipyo. Nitambong pa ang hapit 96 ka mga nakapalit sa lote ug daghang nakapalit ang nakahatag na og downpayment. Pipila lang ang nakakuha og refund samtang kadaghanan wala mauli-i sa ilang kwarta, tungod kay nagpadayon ang isyu sa tinuod nga tag-iya sa yuta ug wala na mahibal-i sa DHSUD asa na ang developer nga responsable sa pagbaligya.
Tungod sa kahimtang, ang LGU Barili nagpasidaan sa publiko nga dili usa ka makig-transaksyon o mopalit og lote nga nalambigit sa Greenbelt Subdivision hangtod masulbad ang legal ug regulatory issues sa proyekto.
Giduso usab sa LGU ang mga residente nga moduol sa Municipal Planning and Development Coordinator (MPDC) Office nga naa sa 2nd floor sa Munisipyo kung gusto masuta kung mahimo bang patukoran og balay ang ilang napalit nga yuta o kung sakto ba ang mga dokumento. Gihangyo nga dalhon ang tanang papeles aron masusi kini sa buhatan.
Nagpahinumdom ang LGU nga magmatngon ug magtinabangay ang tanan aron malikayan ang susamang pagpangilad sa umaabot.
Source: Municipality of Barili
I via Renante Socia Lada