Nakabsan gyud sa kinabuhi ang usa ka lalaki human nadasmagan sa pangpasaheruan nga bus.
Ang aksidenti nahitabo Dominggo sa gabii, Septembre 24, 2023, didto sa Barangay Linao Lipata, lungsod sa Minglanilla, Probinsya sa Sugbo.
Ang biktima giila sa Minglanilla Police Station nga mao si Rey Espina, 50 anyos ang panuigon, residenti sa Barangay Mambaling, siyudad sa Sugbo.
Sa inbestigasyon sa Minglanilla Police Station nasayran nga paingon sa South nga bahin ang bus sa dihang wala na bantayan ang biktima nga nilabang.
Sa kakusog sa impact nalagpot si Espina sa karsada na maoy hinungdan sa iyang pagkaangol.
Gisulayan pa unta kini pagdala sa Minglanilla District Hospital apan sa pagka alas 11:00 sa gabii nabugtuan kini sa kinabuhi.
Sa pagkakaron padayong gitanggong si Marlito Lepar, kinsa maoy suspetsado nga nagmaniho sa maong bus. (Renante Lada, photo courtesy of Minglanilla Flash Report)