Nadakpan sa kapulisan ang usa ka wanted person nga gipasanginlan sa kasong pagpanulis atol sa operasyon sa pagsilbi sa warrant of arrest sa Barangay Tangil, Dumanjug, Cebu niadtong nakalabay nga adlaw.
Gipahigayon ang operasyon sa Tracker Team sa Dumanjug Municipal Police Station uban sa tabang sa Vallehermoso Municipal Police Station ug Coast Guard Sub-Station Dumanjug. Gitumbok sa kapulisan ang suspek pinaagi sa warrant of arrest nga gi-isyu sa Regional Trial Court Branch 102 sa Guihulngan City, Negros Oriental alang sa kasong Robbery with Force Upon Things.
Sumala sa kapulisan, adunay piyansa nga nagkantidad og ₱100,000 para sa temporaryong kagawasan sa akusado. Human madakpan, gipahibalo sa suspek ang iyang kaso ug ang iyang mga katungod ubos sa balaod sa wala pa siya gidala sa stasyon sa kapulisan alang sa hustong dokumentasyon.
Gipasalamatan ni Cebu Police Provincial Office Director Abubakar Udang Mangelen Jr. ang mga operatiba ug mga kaabag nga ahensya sa malampusong pagdakop sa wanted person. Matud niya, ang maong kalampusan nagpakita sa importansya sa maayong koordinasyon ug panagtinabangay sa mga law enforcement agencies aron mapanubag sa korte ang mga gipangita sa balaod.
Padayon usab ang kampanya sa Cebu Police Provincial Office batok sa mga wanted person ug gihangyo ang publiko nga motabang pinaagi sa paghatag og impormasyon nga makatabang sa pagdakop sa mga tawo nga adunay naglungtad nga warrant of arrest.
I via Renante Socia Lada