Nakabsan ang usa ka 23 anyos nga motorista human mabangga sa poste ang iyang gimanehong motorsiklo sa Rizal Extension, Barangay Dumlog, Talisay City, pasado alas 11 sa kagabii sa Disyembre 28, 2025.
Ang biktima nailhan nga si Anjo Philip Huerte Gaviola, residente sa Barangay Poblacion Pardo, Cebu City, nga nagmaneho sa Yamaha NMAX nga motorsiklo.
Base sa inisyal nga imbestigasyon sa Talisay City Police Station, gikan sa Barangay Pooc ang biktima ug padulong unta sa laing dapit sa dakbayan sa Talisay, dihang kalit nga nawad-an og kontrol sa manubela ug mibangga sa poste sa kilid sa dalan, nga miigo usab sa linya sa tubig.
Tungod sa kusog sa impak, grabe ang samad nga naangkon sa biktima ilabi na sa ulo, nga maoy hinungdan sa iyang hinanaling kamatayon.
Miresponde ang Talisay City Rescue Team, apan sa ilang pag-abot sa lugar, wala na’y vital signs ang biktima ug gideklarar nga patay na.
Nagpadayon ang imbestigasyon sa kapulisan aron mahibal-an ang eksaktong hinungdan sa aksidente.
Samtang, gipahinumduman ang mga motorista nga mag-amping sa pagdrayb, ilabi na sa gabii ug sa mga lugar nga kulang og suga, aron malikayan ang susamang disgrasya.
Source: Talisay City Police Station
I via Renante Socia Lada