Nadakpan sa kapulisan sa Mambaling ang usa ka lalaki nga giila nga wanted person tungod sa kaso nga robbery o tulis sa Cebu City.
Nahimong malampuson ang pagdakop human gipahigayon sa mga pulis sa Police Station 11 ang manhunt operation sa hapon sa Marso 10, 2026 sa Sitio Upper Kalunasan, Barangay Kalunasan, Cebu City. Didto nasikop ang suspek nga dugay nang gipangita sa kapulisan.
Ang operasyon gihimo ubos sa pagdumala ni Police Colonel George V. Ylanan, OIC sa Cebu City Police Office, ug sa direktang superbisyon ni Police Major Michael John M. Arandia, station commander sa Police Station 11. Ang pagdakop gihimo sa mga miyembro sa Warrant Server PNCO, Station Drug Enforcement Unit ug intelligence operatives nga gipangulohan ni Police Captain Jerric Allan M. Arrellano.
Gibase sa Warrant of Arrest nga gi-isyu niadtong Marso 9, 2026 sa Regional Trial Court Branch 14 sa Cebu City ang pagdakop sa suspek tungod sa kasong robbery. Gitakda sa korte ang piyansa nga ₱100,000 alang sa iyang temporaryong kagawasan.
Human madakpan, gipahibalo ang suspek sa iyang mga katungod ug gidala sa Police Station 11 alang sa hustong dokumentasyon. Sa pagkakaron, gibutang siya sa Cebu City Jail Male Dormitory samtang naghulat sa sunod nga proseso sa korte.
Source: CCPO
I via Renante Socia Lada