Gisulayan unta pagdala sa tambalaban apan nabugtuan sa iyang kinabuhi ang usa ka lalaki nga nag ayo sa atop.
Pasado alas 2:45 kagahapon sa hapon, Nobembre 10,2022, didto sud sa Tsuneishi Heavy Industries Cebu Inc. (THICI), Brgy. Buanoy, lungsod sa Balamban, probinsya sa Sugbo.
Ang biktima mao si Romeo Delos Santos, 52 anyos ang panuigon, Lead Man, residenti sa Sitio Purok Pondok, Barangay Pondol, Lungsod sa Balamban.
Segon sa kapulisan sa lungsod sa Balamban nga ang maong aksidenti nataho sa ilang buhatan pasado alas 6:20 kagabii, sa maong adlaw.
Sa pag respondi na sa kapulisan ilang nasayran nga si Delos Santos nikatkat sa maong factory nga adunay gihabugon nga 70 meters aron sa pag ayo sa naguba nga atop.
Apan aksidenting nakatunob sa fiber transparent nga atop ang biktima nga maoy hinungdan nga nahulog kini.
Sa subrang gitas-on naka angkon og serious physical injuries si Delos Santos na maoy hinungdan sa iyang hinalaling kamatayon.
Dugang inbestigasyon ang gihimo karon sa kapulisan sa Balamban. (Renante Lada, photo courtesy of Balamban Police Station)