Patay ang usa ka 28-anyos nga lalaki human kini gipusil sa wala mailhing mamumuno sa Riverside, Barangay Poblacion Oriental sa lungsod sa Consolacion, pasado alas 12:10 sa udto niadtong Hulyo 25, 2025.
Gikumpirmar sa kapulisan nga ang biktima mao si Cedrick Nickson Lauron Postrado, ulitawo ug residente sa Barangay Calero, Liloan, Cebu. Matud sa initial nga imbestigasyon sa Consolacion Police Station, nakadawat sila og tawag gikan sa usa ka concerned citizen nga may gipusil nga nahitabo sa maong dapit.
Pag-abot sa mga otoridad, ilang naabtan ang biktima nga nagbuy-od sa dalan nga nagdugo. Dali siyang gihatod sa Eversley Childs Sanitarium Hospital, apan gideklarar siya nga dead on arrival sa doctor nga mitan-aw kaniya.
Gikan sa imbestigasyon sa Scene of the Crime Operatives (SOCO), narekober sa crime scene ang duha ka empty shell sa kalibre .45 nga bala ug usa ka fired slug, nga posible gigamit sa suspetsado.
Padayon karon ang hot pursuit operation ug follow-up investigation sa kapulisan aron mailhan ang responsable sa maong krimen ug mahibal-an ang tinuod nga motibo sa pagpamusil.
📸 CTTO
I via Renante Socia Lada