Usa ka bag-ong sinkhole ang nakit-an sa Purok Mahogani, Barangay San Isidro, Tabogon, Cebu niadtong Sabado, Oktubre 18, 2025. Ang maong sinkhole nabantayan sa mga residente human makamatikod sila og kalit nga pag-anam kalubong sa yuta sa usa ka bahin sa ilang lugar. Tungod niini, dali silang mipahibalo sa mga otoridad aron malikayan ang posibleng disgrasya.
Ang Municipal Disaster Risk Reduction and Management Office (MDRRMO) Tabogon miadto dayon sa assessment ug monitoring aron matino ang giladmon ug gilapdon sa sinkhole. Ang mga eksperto usab sa munisipyo nagkuha og sukod ug nagplano sa pagbutang og pahimangno sa palibot sa lungag aron masiguro ang kaluwasan sa publiko.
Sumala sa inisyal nga impormasyon, wala pa may nadaot o nasamdan tungod sa panghitabo. Bisan pa niini, gipahimangnoan sa mga otoridad ang mga residente nga likayan ug dili duolon ang lugar samtang padayon pa ang teknikal nga pagsususi. Gisirhan usab ang maong dapit aron malikayan ang kalit nga pag-anam kalawom sa yuta.
Ang LGU Tabogon nag-awhag sa tanang lumulupyo nga magpabilin nga alerto ug mag-report dayon kung adunay mabantayan nga sama nga kalihukan sa yuta sa ilang barangay. Gipangayo usab sa lokal nga kagamhanan ang kooperasyon sa tanan aron mapadali ang pagsusi ug matubag dayon ang mga risgo nga makadaut sa kinabuhi ug kabtangan.
Sa karon, padayon ang validation ug monitoring sa MDRRMO kauban ang mga geologists ug engineers aron masuta kung unsa ang hinungdan sa paglungag sa yuta. Mahinumduman nga niadtong Sept. 3O, 2025, naigo sa linog ang Amihanang bahin sa Sugbo.
Source: Tabogon LGU
I via Renante Socia Lada