Gibutyag sa Cebu City Police Office (CCPO) nga mikunhod ang krimen sa dakbayan og 57.69% gikan Abril 23 hangtod Mayo 22, 2025, kung ikumpara sa parehas nga panahon niadtong 2024. Gisundan usab kini og zero shooting incidents karong buwana, usa ka dako nga kalampusan alang sa kapulisan ug komunidad.
Sa miaging tuig, adunay 78 ka kaso nga nalambigit sa mga major crimes sama sa pagpatay, kawat, pagpanglugos, ug uban pa. Karong tuiga, nahimo na lang kini 45 ka kaso.
Mas taas usab karon ang crime solution efficiency, gikan sa 73.75% sa 2024, misaka kini sa 87.88% karong 2025 tungod sa kusog nga imbistigasyon sa Criminal Investigation and Detection Unit (CIDU).
Ang insidente sa pagpamusil, nga miabot sa 12 ka kaso niadtong Enero 2025, mikunhod pag-ayo.
Ang mga programa sama sa “Isumbong Mo Kay CD,” night patrols, ug Oplan Bulabog dako ang natabang sa pagpakunhod sa krimen. Ang mga checkpoint sa panahon sa eleksyon ug ang aktibo nga pag-apil sa komunidad nagpakita nga mas lig-on ang relasyon tali sa kapulisan ug katawhan.
Gipangulohan ni Acting City Director PCOL Enrico E. Figueroa ang mga inisyatiba uban ang suporta ni PBGEN Redrico A. Maranan sa Police Regional Office 7.
Nagpabiling lig-on ang panaad sa CCPO sa pagpanalipod sa katawhan ug pagpadayon sa kalinaw ug seguridad sa Cebu City.
Source: CCPO
I via Renante Socia Lada