Misaka ang pagsalig publiko sa kapulisan human nakab-ot sa Police Regional Office 7 (PRO7) ang pag-ubos og 31.14% ang mga “focus crimes” sa Central Visayas gikan Enero 1 hangtod Mayo 31, 2025.
Gisulti ni PRO7 Regional Director PBGEN Redrico A. Maranan nga ang dakong pagkunhod sa krimen resulta sa ilang lig-on nga presensya, padayon nga operasyon, ug aktibong pakigtambayayong sa komunidad.
Base sa datos sa Crime Information Reporting and Analysis System (CIRAS), gikan sa 1,400 ka kaso niadtong 2024, nahimong 964 na lang karong 2025, 436 ka kaso ang nakunhuran.
Ang mga “focus crimes” naglakip sa murder, homicide, physical injury, rape, robbery, theft, ug carnapping. Sa tanang kategorya, halos tanan niubos gawas sa homicide nga misaka gamay (gikan 18 ngadto 20). Bisan pa niini, napasakaan og kaso ang tanang nalambigit nga suspek.
Matud pa, ang 31.14% nga pagkunhod sa krimen dili lang tungod sa paningkamot. Kalampusan kini sa tanang sektor nga nitambayayong sa kapulisan.
Sa kasamtangan, ang crime clearance rate sa PRO7 anaa sa 99.07% ,pasabot nga halos tanan nga kaso nasulbad na ug nabalhog sa bilangguan ang nalambigit.
Miubos usab ang Average Monthly Index Crime Rate sa tulo (3) ra ka insidente matag 100,000 ka tawo — timaan sa mas malinawon ug mas luwas nga Central Visayas.
Ang PRO7 nagpadayon sa ilang “Peace and Order Operational Formula” nga naglangkob sa:
Enhanced Police Presence + Quick Response + Aksyon batok sa Drug Syndicates, Criminal Gangs, ug Private Armed Groups.
Ang PRO7 mipasalig nga ipadayon ang ilang serbisyo ug kooperasyon uban sa katawhan alang sa dugang kalinaw ug kaluwasan sa tibuok rehiyon.
Source: PRO7
I via Renante Socia Lada