Mohangyo si Konsehal Pastor “Jun” Alcover, Jr. kang Acting Mayor Raymond Alvin N. nga dili na pabayron og entrance fee nga P20 ang mga senior citizen ug mga Persons with Disabilities (PWDs) sa Cebu City Sports Center CCSC.
Gipadangat niya ang maong hangyo pinaagi sa usa ka privileged speech atol sa ilang regular session kagahapon, Agusto 14, 2024.
Matud ni Alcover, nga chairman sa senior citizens committee sa Konseho sa Dakbayan, nga walay rason nga dili malibre sa bayranan ang mga senior citizens og PWDs diha sa CCSC.
“Kay kun g ilibre kini, mas makaagni sa atong mga senior citizens og PWDs nga moanha maglakaw-lakaw mag-jogging ba ang uban para mapromote mapataas pa ang ilang mga kinabuhi diha sa gitawag natog Cebu City Sports Center”
Kasamtangang nagtagamtam lang og P5 nga diskwento ang mga senior citizens ug mga PWD sa ilang pagsulod sa CCSC, kay imbis nga P25 nahimo nalang kining P20, o diskwento nga 20 porsiyento.
Sumala sa Republic Act No. 9994 (Expanded Senior Citizens Act of 2010), adunay espesyal nga mga prebilihiyo sama sa 20 porsiyento nga diskwento sa mga batakang palaliton ug mga kan-an, ayuda, ug medikal nga benepisyo, ug uban pa.
Tumong sa balaod nga maharuhay ang pagpuyo sa mga senior ug kalogwayan pa ang ilang mga kinabuhi.
Subay sab sa lokal nga mga ordinansa sa Dakbayan sa Sugbo, makapahimulos pud og libre nga bayranan sa parking, apil na sa mga sinehan, ang mga senior, gawas pa sa binuwan nga hinabang pinansiyal nga P1,000, o P12,000 matag tuig. (Renante Socia Lada)
(Source: Cebu City PIO)