Nagpadayon karon ang Consolacion Police Station sa ilang hot pursuit operation batok sa suspetsado nga nakapusil patay ug nakaangol.
Didto kini nahitabo sa District 2, Barangay Pulpogan, lungsod sa Consolacion, Sugbo, pasado alas 12:05 sa tungang gabii, Mayo 26, 2024.
Ang mga biktima giila sa Consolacion Police Station nga sila si Ken Ashly Guinto, 19 anyos ang panuigon, ug Inosentes Bercide Covarde, 49 anyos, pulos sila residenti sa naasoy nga Barangay.
Ang gitumbok nga suspetsado naila sa alyas nga “Planga”, 16 anyos ang panuigon, taga Sitio Cantila, Barangay Poblacion Occidental, sa mao ra nga Lungsod.
Sa imbestigasyon sa Consolacion Police Station pinanguluhan sa ilang hepe nga mao si PLTCOL Ruel Burlat, nasayran nga ang suspetsado namisita sa maong lugar nga gipareglahan sa grupo sa mga biktima.
Nitumaw ang kagubot nga ni resulta sa pagpamusil nga naigo sa ulo si Guinto samtang naigo sa tuo nga bahin sa lawas si Covarde.
Human sa pagpamusil daling nisibat ang mamumuno palayo sa maong lugar.
Samtang nakabsan gyud sa kinabuhi si Guinto didto sa tambalanan. (Renante Socia Lada)