Ang Kagamhanan sa Probinsiya sa Sugbo nimando sa Power Source Philippines, Inc. (PSPI) sa pagpahunong sa operasyon sa ilang power plant sa Malapascua Island, Daanbantayan, Cebu, tungod sa dakong kalapasan sa environmental regulations.
Ang Malapascua Island, usa ka iladong destinasyon sa mga turista, nagserbisyo kini og kuryinte sukad niadtong tuig 2019.
Ang mga lumulupyo ug mga negosyo, ilabina ang Malapascua Business Association, nagreklamo bahin sa kanunay ug dugay nga pagkawala sa kuryente sa maong lugar nga napugos sila paggamit og mga generator, bisan paman sa tukma nila nga pagbayad sa kuryinte.
Kini nga mga isyu nisangko sa usa ka dakong blackout sa niadtong Agosto 5, 2024, nga grabing nakabalda sa adlaw-adlaw nga kalihokan sa isla ug industriya sa turismo.
Mahinomduman nga usa ka inspeksyon sa Environmental Management Bureau (EMB) niadtong Hulyo 26-27, 2024, diin nakadiskubre sila og daghang mga kalapasan sa ilang operasyon sama sa; walay Environmental Compliance Certificate, dili husto nga hazardous waste storage, ug sobra sa effluent standards alang sa lana ug grasa.
Kini nga mga kalapasan naghatag ug seryoso nga ka risgo sa palibot sa isla ug sa kahimsog sa mga lumulupyo ug mga bisita niini.
Si Gobernador Gwendolyn Garcia niluwat sa cease and desist order karong adlawa Agosto 6, 2024 nga kinahanglanon nga unahon ang panglawas sa katawhan ug kalikupan.
Ang lokal nga kagamhanan sa Daanbantayan, Barangay Logon, ug Philippine National Police maoy gitahasan sa pagpatuman sa maong direktiba. (Renante Socia Lada)
(Source: Sugbo News)