Cebu: KAPITOLYO SA SUGBO NAKATIGUM OG ₱135.6 MILYON NGA TABANG PARA SA MGA BIKTIMA SA LINOG SA AMIHANANG BAHIN SA SUGBO

0
3

Tungod sa linog nga miigo sa Sugbo, dili lang mga bilding ang natay-og, kundi apil usab ang mga kasingkasing nga nabanhaw sa pagtabang.

Sumala sa pinakabag-ong datos, nakaangkon na ang Lalawigan sa Sugbo og ₱135.6 milyon nga donasyon, timaan sa pagkahiusa ug kalooy gikan sa mga indibidwal, organisasyon, lokal nga mga kagamhanan ug ahensya.

Gamit na o giapod-apod na ang kapin ₱111 milyon alang sa mga operasyon sa relief ug recovery nga nakaabot sa libo-an ka pamilya sa mga apektadong lugar. Samtang ang nabiling ₱23 milyon gamiton para sa pagpatindog usab sa mga balay, pagpabuhi sa panginabuhian, ug pagpabangon sa mga komunidad sa umaabot nga mga semana ug bulan.

Apan dili lang sa kadako sa kantidad masukod ang kadasig sa mga Sugbuanon, kundili sa mga gamay nga istorya sa kalooy. Sama ni Jamaiah Requinto, usa ka estudyante nga mitabang pinaagi sa paghatag og gamay nga supot sa paracetamol. Bisan gamay ra, dako kini’g kahulugan para sa mga nanginahanglan ug nakahatag og paglaum sa uban.

Usab, si Lina Banque gikan sa Tabunok, Talisay City, nga misaulog sa iyang adlawng natawhan sa Oktubre 9 pinaagi sa pagdonar og ₱5,000 para sa mga biktima sa linog imbes maghanda sa kaugalingong selebrasyon, usa ka tinuoray nga buhat sa pagmahal ug pagkamaluluy-on.

Ang mga buhat nga sama niini, inubanan sa milyon-milyon nga tabang gikan sa kompanya, pamilya, ug organisasyon, maoy tinuod nga kasingkasing.

Nagpasalamat si People’s Governor Pam S. Baricuatro sa tanang nagtampo ug mitabang, bisan dako o gamay, pinansyal o serbisyo man.

Padayon pa ang dalan sa pagbangon, apan mas kusgan na ang kasingkasing sa mga Sugbuanon ug Pilipino.
Kay kon ang kalooy magtinabangay, wala’y tabang nga gamay, wala’y panahon nga ulahi, ug wala’y lagyo nga dili maabot.

Source: Cebu Province PIO
I via Renante Socia Lada

Leave a Reply