Gipasidunggan sa Kapitolyo sa Sugbo ang kaisug sa duha ka residente sa Liloan nga nakaluwas og daghang kinabuhi atol sa grabe nga pagbaha nga gidala sa Bagyong Tino niadtong Nobyembre 4.
Personal nga gitunol ni Gobernadora Pamela Baricuatro ang sertipiko sa pag-ila ngadto nila Jayboy Magdadaro, nga nakaluwas og kapin 50 ka tawo, ug Joshua Sandal, nga nakaluwas og labing menos 15 ka residente. Silang duha taga-Brgy. Jubay ug nagpakita sa dakong papel sa pagtabang sa ilang mga silingang bata, tigulang, mabdos nga maabot sa luwas nga lugar samtang misaka ang tubig-baha.
Gihatagan usab sila sa gobernador og pinansyal nga tabang gikan mismo sa iyang personal nga pondo isip pagpasalamat sa ilang pagka-bayani.
Si Jayboy Magdadaro, 15 anyos, nakadawat og dakong pagdasig human niya napadayon ang pagluwas gikan buntag hangtod gabii. Gamay ra ang kahoy nga sakayan nga iyang gigamit, upa’t ra ka tawo ang masakyan matag biyahe apan balik-balik gihapon siya bisan kusog ang agas. Gipahimuslan niya ang lifebuoy aron makabalik sa lugar nga daghan pang nanginahanglan og tabang, unya mosakay gihapon siya aron makadool sa mga nagtawag og tabang.
Sa usa ka pagluwas, iyang gipas-an ang usa ka bata samtang nagkupot sa lifebuoy. Lawom ang agos sa tubig nga halos moabot sa iyang liog, apan iyang naprotektahan ang bata ug naluwas kini.
Grade 9 si Jayboy ug mao ang kinamanghuran sa lima ka managsoon. Ang iyang inahan nga si Alma municipal sweeper, samtang ang iyang amahan job-order worker sa lokal nga kagamhanan. Tungod sa ilang panimalay nga puno sa serbisyo publiko, natun-an niya sayo ang pagkamatinud-anon, kalooy sa isigkatawo, ug pag-alagad bisan walay balos.
Source: Cebu Province PIO
I via Renante Socia Lada
