Magtukod ang Cebu Provincial Government og bag-ong opisina nga magtutok sa pagpalig-on ug pagtabang sa mga kooperatiba, nga target ablihan sa unang tulo ka bulan sa sunod tuig.
Gipahibalo kini ni Cooperative Development Authority (CDA) Region 7 Director Cristina Villamil human sa iyang panagtagbo ni Gov. Pamela Baricuatro sa Kapitolyo niadtong Nobyembre 18.
“This is really a welcome development for us in the cooperative movement,” Villamil said. “The cooperative movement really has to be strengthened if we want to bring the people to the mainstream of development processes.”
Atol sa panagtagbo, gipadayag ni Gov. Baricuatro nga ang bag-ong provincial office mopailalom sa Office of the Governor, ug butangan og kwalipikadong mga personnel ug usa ka consultant aron masiguro ang insakto nga pagdumala.
Gipasabot usab ni Villamil nga bisan og adunay 266 ka rehistradong kooperatiba sa probinsya sa Sugbo, wala kini’y direkta nga koneksyon sa provincial government sa milabayng mga tuig—lahi sa ubang siyudad ug lungsod nga aktibo nga gisuportahan sa ilang mga mayor.
“We are very thankful to Gov. Pam. Kon naa lang untay kooperatiba sa matag lungsod, lives will be uplifted through the cooperative’s services,” dugang niya.
Ang CDA, nga usa ka attached agency sa Department of Trade and Industry, maoy nag-una sa pagpalambo ug pagpadayon sa lig-on nga pagtubo sa mga kooperatiba sa tibuok nasod, aron kini mahimong instrumento sa sosyal nga hustisya, pagkaparehas, ug malungtarong kalamboan sa ekonomiya.
Source: Cebu Capitol PIO
I via Renante Socia Lada