Magpatuman ang Cebu Provincial Government, uban sa mga kaabag nga medikal, og libreng Ophthalmology Surgical Mission sa Oslob District Hospital karong Nobyembre 21 hangtod 23.
Sumala ni Dr. Nikki Catalan, piso health consultant sa Kapitolyo, mahimong posible ang maong misyon tungod sa pakig-alayon tali sa Probinsya sa Sugbo ug sa Vicente Sotto Memorial Medical Center – Ophthalmology Department.
Nagsugod na ang pre-screening sa mga pasyente niadtong Domingo, Nobyembre 16, sa Oslob para sa mga kaso sa katarata ug pterygium. Ang pterygium usa ka kondisyon sa mata nga adunay luta o piraso nga motubo sa conjunctiva ug mosamot og tubo padulong sa cornea nga makapagamay sa panan-aw.
Matod ni Provincial Board Member Dr. Stanley Caminero, nga mao usab ang chairman sa komitiba sa public health, nga gikan sa inisyal nga screening, adunay labaw-kulang 50 ka pasyente nga naay katarata ug 50 ka pasyente nga naay pterygium nga maoy moagi og libre nga operasyon atol sa tulo ka adlaw nga misyon sa southern Cebu.
“Kining maayong programa, lapad nga programa sa Probinsya sa Sugbo ubos sa pamunoan ni Governor Pam, subay gyud sa iyang saad ug iyang gibarugan,” matod ni Board Member Caminero.
Nagpasalamat usab si Dr. Catalan sa mga medical personnel nga nitabang sa pre-screening: sila Dr. Farida Marcelle Vergara, Dr. Erika Mae Galeos, ug Eye Center staff nga sila Marivie Fabon, Vianney Dagandan, ug Melca Ardiente.
Source: Cebu Capitol PIO
I via Renante Socia Lada