Andam na ang mga otoridad sa Sugbo alang sa Sinulog Festival 2026 human gilusad ang send-off ceremony sa liboan ka security ug emergency personnel sa Cebu City Sports Center ning kabuntagon, Enero 5, 2026.
Kapin 6,657 ka mga personnel ang ipakatap sa nagkalain-laing lugar sa dakbayan ug mga dapit sa kalihukan. Kini naglangkob sa kapulisan, bombero, coast guard, navy, AFP, BJMP, DOH, CCTO enforcers, ug mga force multipliers nga magtinabangay aron masiguro ang kaluwasan sa tanan.
Sumala sa mga awtoridad, dili lang lokal nga kapulisan ang ipakatap, kondili apil usab ang dugang nga PNP personnel gikan sa ubang lugar sa rehiyon aron mas mapalig-on ang seguridad.
Gilauman nga dagsaon sa minilyon ka deboto ug bisita ang mga kalihukan sa 461st Fiesta Señor Santo Niño ug Sinulog Festival, busa gipasiugda nga prayoridad ang kahapsay sa trapiko, kaluwasan sa publiko, ug paspas nga responde sa tanang emerhensiya.
Padayon ang panawagan sa mga otoridad sa katawhan nga makigtambayayong, mosunod sa mga patakaran, ug magbantay sa kaugalingong kaluwasan aron magmalampuson ug malinawon ang selebrasyon sa Sinulog 2026.
Source: CCPO
I via Renante Socia Lada