Nakasikop og kinatibuk-ang 556 ka mga nakalapas sa ordinansa ang Cebu Police Provincial Office (Cebu PPO) atol sa gipakusgan nga operasyon sa tibuok probinsya, nga nagresulta sa pagkolekta og ₱71,316 nga multa ug paghatag og pasidaan sa 378 ka indibidwal.
Ang maong operasyon gihimo pinaagi sa 96 ka police activities sa nagkadaiyang lungsod ug siyudad, isip kabahin sa padayon nga paningkamot sa kapulisan sa pagpatuman sa disiplina, kaluwasan, ug kahapsay sa komunidad.
Base sa report, kadaghanan sa mga kalapasan naglakip sa 233 ka menor de edad nga nasakpan nga milapas sa curfew, 185 ka indibidwal nga nadakpan tungod sa pag-inom ug panigarilyo sa publikong lugar, ug 94 ka paglapas sa city ordinances ug traffic rules. Aduna usab 24 ka tawo nga gisita tungod sa paglakaw sa dalan nga walay hustong sanina. Lakip pa sa uban nga paglapas mao ang sobra sa oras nga paggamit sa videoke, obstruction, ug uban pang gagmay nga kalapasan nga makasamok sa kalinaw sa publiko.
Gipadayag nga ang mga siyudad sa Toledo City, Carcar City, ug Danao City maoy adunay dakong ihap sa mga nadakpan, samtang aktibo usab ang ubang mga lungsod sa probinsya sa pagpatuman sa maong kampanya.
Matud ni PCOL. Abubakar Udang Mangelen Jr., Provincial Director sa Cebu PPO, importante ang disiplina ug kooperasyon sa komunidad aron mapadayon ang kalinaw ug kahapsay. Giingon niya nga ang kalampusan sa operasyon nagpakita sa lig-on nga komitment sa kapulisan sa pagpatuman sa mga lokal nga balaod ug ordinansa.
Ang maong inisyatiba uyon usab sa direktiba ni DILG Sec. Juanito Victor Remulla Jr., nga nagmando sa hugot nga implementasyon sa mga lokal nga ordinansa sa tibuok nasud.
Gidayeg usab ni PBGEN. Redrico A. Maranan, Regional Director sa PRO7, ang paningkamot sa kapulisan sa Cebu, nga matud pa niya nagpakita sa ilang dedikasyon sa pagpatuman sa balaod ug pagsuporta sa nasudnong direktiba alang sa luwas ug organisado nga komunidad.
Samtang, mipahayag usab og suporta si Gob. Pamela S. Baricuatro, nga midayeg sa walay hunong nga paningkamot sa kapulisan sa pagpatuman sa mga ordinansa ug pagpanalipod sa kaayohan sa matag Sugboanon.
Gipasalig sa Cebu PPO nga magpadayon ug mas palig-onon pa ang ilang operasyon uban sa koordinasyon sa lokal nga panggamhanan aron mapadayon ang kalinaw ug kahapsay ug mapalig-on ang disiplina sa tibuok probinsya.
Source: CPPO
I via Renante Socia Lada