Kanhi sakop sa Communist Terrorist Group (CTG) ang mitahan sa mga otoridad, pasado alas 2:30 sa hapon niadtong Abril 13, 2025, sa Purok 7, Barangay San Carlos, lungsod sa Danao, Bohol.
Ang maong pagsurrender resulta sa usa ka joint intelligence-driven operation sa 702nd Maneuver Company sa Regional Mobile Force Battalion 7 (RMFB7), kauban ang 32nd Mechanized Infantry Company sa Philippine Army ug ang Community Integrated Information Support (CIIS).
Ang mibalik sa balaod, 45 anyos, giilang kamhi full-time member sa Front Committee 3 sa Central Visayas Regional Party Committee, ug niadtong bag-ohay lang, nalambigit sa Bohol Party Committee-D sa Komiteng Rehiyon-Negros, Cebu, Bohol, ug Siquijor (KR-NCBS). Wala siya sa kasamtangang PSR list sa mga target nga personalidad.
Lakip sa iyang pagsurender mao ang boluntaryong pagtunol sa usa ka rifle grenade, nga gitaho ug gipasa sa Bohol Explosive Ordnance Disposal (EOD) Unit alang sa husto ug luwas nga pag-dispose.
Ang maong indibidwal mag-apply sa Enhanced Comprehensive Local Integration Program (E-CLIP) o sa localized nga Kauban sa Reporma Program (KRP), nga gitukod pinaagi sa Executive Order No. 27, Series of 2023, pinirmahan ni Governor Erico Aristotle Aumentado.
Sa pamahayag ni PRO7 Regional Director, PBGen Redrico Maranan, iyang gipasidunggan ang panaghiusa sa mga pwersa sa kapulisan ug kasundalohan.
Gipasabot usab ni PBGen Maranan nga ang maong pagtahan nagpalig-on sa panaghiusa sa gobyerno sa inclusive peace-building ug dugang nga mga lakang aron makab-ot ang malungtarong kalinaw sa Bohol ug Central Visayas.
Source: PNP PRO7 Public Information Office
I via Renante Socia Lada
#rpndykccebu
#675hzamband