Ang Cebu City Police Office (CCPO), pinangulohan ni Acting City Director PCOL Enrico E. Figueroa, miapil sa paghandum sa ika-148 nga anibersaryo sa pagkatawo sa bantugang lider nga si Vicente Sotto kagahapong adlawa, Abril 15, 2025.
Gipahigayon ang hapsay ug halangdon nga seremonya sa Plaza Sugbu, Cebu City, nga gipangulohan mismo ni Cebu City Mayor Raymond Alvin N. Garcia.
Nagtambong usab ang mga iladong personalidad sama ni Vice Mayor Donaldo “Dondon” Hontiveros, Congresswoman Rachel Marguerite “Cutie” Del Mar, ug mga representante gikan sa Philippine Navy, Bureau of Fire Protection (BFP), Philippine Coast Guard (PCG), ug mga empleyado sa Cebu City Hall.
Lakip sa programa ang pagpahigayon sa wreath-laying ceremony atubangan sa monumento ni Vicente Sotto, gisundan sa usa ka 21-gun salute, ug usa ka bulaknong halad nga nagsimbolo sa pagpasidungog sa iyang dakong kontribusyon sa nasud.
Giila si Vicente Sotto isip usa sa mga haligi sa kasaysayan sa Pilipinas, ilabi na sa iyang panalipod ug pakigbisog alang sa kagawasan sa pamahayag.
Ang partisipasyon sa CCPO nagpakita sa ilang pagpaningkamot sa pagpadayon sa mga prinsipyo sa kagawasan ug hustisya nga gibarugan ni Sotto. Gihatagan og gibug-aton ni PCOL Figueroa ang kamahinungdanon sa paghinumdom sa legasiya ni Sotto ug ang kalabutan niini sa kasamtangang panahon.