Usa ka kanhing pulis nga nag-AWOL (absent without official leave) ang nasikop sa gipahigayon nga anti-drug operation sa mga operatiba sa Regional Drug Enforcement Unit (RPDEU 7) niadtong Disyembre 8, 2024, sa M. Oyson Jr. Street, Barangay Sambag 1, siyudad sa Sugbo.
Ang suspek giila nga si Kenneth Bacalso Yaquit, 40 anyos, ug residente sa Barangay Don Andres Soriano (DAS) Uncronan, Toledo City.
Nakuha gikan sa suspek ang gipangdudahang shabu nga may timbang nga 30 gramos, nga adunay standard drug price (SDP) nga P204,000.00. Matud sa kapulisan kaniadto usa ka sakop si Yaquit sa Philippine National Police (PNP) nga nakasugod pagserbisyo niadtong 2013, apan siya na-dismiss niadtong 2015 tungod sa pag-AWOL.
Gipanid-an ug gi-monitor sa mga operatiba ang lihok sa suspek, nga segun sa intel report aktibo sa pagpamaligya og shabu sa Toledo City ug uban pang dapit sa Sugbo.
Ang maong operasyon kabahin sa padayon nga kampanya sa kapulisan batok sa illegal nga droga. Ang suspek kasamtangang gibalhog ug gipailawom sa imbestigasyon samtang giandam ang kaso nga ipasaka batok kaniya. (Renante Socia Lada)Â