Mipadayag og pakig-usa ang kagamhanan sa siyudad sa Sugbo og tabang sa Iligan City human sa grabeng epekto sa Typhoon Basyang. Isip konkretong aksyon, gipadala sa siyudad ang usa ka rescue ug response team aron motabang sa mga operasyon sa disaster response ug recovery sa maong lugar.
Ang team naggikan sa Cebu City Disaster Risk Reduction and Management Office (CCDRRMO) ug gipangulohan ni City Councilor Dave Tumulak.
Kauban niya ang 28 ka mga personahe sa CCDRRMO ug dugang pang support staff nga andam motabang sa bisan unsang panginahanglan sa Iligan City.
Tumong sa misyon sa Cebu City team ang paghatag og teknikal ug logistical nga suporta, lakip na ang koordinasyon sa local responders, assessment sa kahimtangan sa mga apektadong lugar, ug tabang sa rescue ug relief operations.
Padayon pa ang recovery efforts sa Iligan City, ug dako ang papel sa inter-city cooperation aron mas paspas ug mas epektibo ang pagbangon sa mga komunidad nga naapektuhan sa bagyo.
Nagpasalig ang Cebu City nga magpadayon sa paghatag og tabang ug pag-ampo alang sa kaluwasan ug kaayohan sa tanang apektadong pamilya, isip pagpakita sa espiritu sa bayanihan ug pagtinabangay sa panahon sa kalamidad.
Source: Cebu City PIO
I via Renante Socia Lada