Niining nagkaduol na nga Palarong Pambansa 2024 gipahibalo sa kagamhanan sa probinsya sa Sugbo na muhatag sila og P8 milyon para sa maong nasudnong kalihukan sa dula,
Magsugod kini karong Hulyo 9 hangtod Hulyo 16, 2024, diin ang siyudad sa Sugbo maoy host niini.
Samtang ang Kapitolyo maoy maghost sa closing ceremony karong Hulyo 16, 2024, didto sa Cebu City Sports Center.
“Nalipay kaayo ta. Nagpakita gyod diay nga ang Cebu is really One Cebu Island, magtinabangay ta. So nalipay kaayo ko nga si Governor, nisugot siya nga sila maoy mo-handle sa finale sa atong Palaro. Nindot kaayo, show of unity,” segon ni Acting Mayor Raymond Alvin Garcia.
Gilauman nga tambungan ang Palarong Pambansa sa Sugbo nila ni President Ferdinand Marcos Jr., Vice President Inday Sara Duterte, mga Senador, ug ubang kadagkuan sa ahensya sa goberno.
Aduna usab kini mga delegado na muabot ngadto sa 15,000 nga nagagikan sa nagkadaiyang mga rehiyon sa nasud.
Daghan ang nalipay karon sa hugot nga suporta sa kagamhanan sa probinsya sa Sugbo diin gipakita gyud ang pagtinabangay isip usa ka “One Cebu Island”, walay pag duha-duha usab si Cebu Gov. Gwen Garcia sa pagsuporta na mahimo kining malampuson. (Renante Socia Lada)