Dako ang nadangatang kalampusan sa Police Regional Office 7 (PRO7) atol sa Simultaneous Anti-Criminality Law Enforcement Operations (SACLEO) nga gihimo gikan Nobyembre 21 hangtod 23, 2025, diin ang intelihensiya ug hugot nga koordinasyon sa kapulisan mitultol sa dakong epekto batok kriminalidad ug iligal nga drogas sa rehiyon.
Sa tulo ka adlaw nga operasyon, nakahimo ang PRO7 og buy-bust operations, pagpahigayon og search warrants ug warrants of arrest, police responses, ug checkpoint operations nga miresulta sa pagdakop sa 178 ka drug personalities. Nakumpiskar usab ang 1,080.90 ka gramos nga giingong shabu nga nagkantidad og ₱7,350,120.
Matod sa PRO7, ang maong kalampusan nagpamatuod sa epektibo nga paggamit sa intelligence fusion, data-driven targeting, ug lig-on nga panag-uban sa tanang police units aron maputol ang drug distribution network ug maminusan ang kriminalidad.
Samtang gipadayon ang kampanya batok sa mga wanted persons, nadakpan ang 5 ka Most Wanted Persons, upat (4) sa regional level ug usa (1) sa municipal level, ug 18 pa ka laing wanted sa nagkalain-laing kaso, nga nagdala sa kinatibuk-ang 201 ka nasikop.
Sa iyang pamahayag, giangkon ni PBGEN Redrico A. Maranan, Regional Director sa PRO7, ang estratehikong epekto sa maong mga kalampusan:
“Each arrest weakens the drug trade, each seizure disrupts supply, and each operation brings us closer to safer communities. PRO7 will continue to intensify efforts to safeguard the public,” segon ni PBGEN Maranan.
Iyang gipadayag ang padayon nga pagpalig-on sa seguridad ubos sa intelligence-led policing, uban sa pagpaningkamot nga magpabilin ang Central Visayas nga rehiyon nga malinawon ug luwas.
Gidugang pa niya ang pag-awhag sa tanang personahe:
“Under my leadership, we will continue pushing forward, ensuring that Central Visayas remains a region of peace, order, and security.”
Source: PRO7 PIO
I via Renante Socia Lada