Nakarekord ang Philippine Atmospheric, Geophysical and Astronomical Services Administration Mactan Complex Station sa Lapu-Lapu City og taas nga temperatura ug heat index alas 3:00 sa hapon kagahapon Abril 23, 2026.
Sumala sa datos, ang temperatura miabot sa 32.2°C samtang ang relative humidity naa sa 54 porsyento. Ang heat index, nga mao ang gibati nga kainit sa lawas, miabot sa 35°C.
Ang maong lebel giklasipikar ubos sa “Extreme Caution,” diin posible nga makasinati ang mga tawo og heat cramps ug heat exhaustion. Gipasidan-an usab nga ang dugay nga pagpundo sa init o padayon nga pisikal nga kalihokan mahimong mosangpot sa heat stroke.
Gipahimangnoan ang publiko nga magpabiling hydrated pinaagi sa kanunay nga pag-inom og tubig, limitahan ang pagpabilin sa gawas, ug magpundo sa mga lugar nga bugnaw o adunay landong aron malikayan ang epekto sa kainit.
Padayon nga gimonitor sa mga otoridad ang kahimtangan sa panahon samtang gidasig ang mga residente nga mag-amping ilabina sa mga oras nga kusog ang init sa adlaw.
📸 Cebu City PIO
I via Renante Socia Lada