Nakarekord ang dakbayan sa Sugbo nga maayong resulta sa pagdaginot sa resources human ipatuman ang four-day work week, sumala sa report sa Department of General Services nga naglangkob sa Abril 6 hangtod 17, 2026.
Sa bahin sa tubig, nakita ang sayong kalampusan diin mikunhod ang gasto gikan ₱48,419 ngadto sa ₱34,987, o katumbas sa 27.7 porsyentong pagkunhod gikan sa ulahing bahin sa Pebrero hangtod sayong Abril. Apan, nisaka pag-usab ang gasto sa tubig sa semana sa Abril 11 hangtod 17 ug miabot sa ₱40,834, o 14.98 porsyentong pagsaka, nga nagpakita nga wala mapadayon ang unang natigom nga savings.
Sa konsumo sa kuryente, nagpabiling ubos ang paggamit sa nagkalain-laing government buildings. Ang Executive Building nakarekord og pagkunhod nga 21% hangtod 23%, samtang ang Legislative Building mikunhod og 6% hangtod 28%. Ang Finance/ABC Building maoy adunay pinakadako nga pagkunhod nga 28% hangtod 38%. Bisan pa niini, giingon sa report nga dili kanunay nga nagpasabot og dako nga daginot sa gasto ang ubos nga konsumo tungod sa ubang bayronon sama sa demand charges ug operational factors.
Dako usab og natabang ang pagkunhod sa konsumo sa fuel. Ang paggamit sa diesel mikunhod og kapin sa 50 porsyento, uban sa weekly reductions nga 51.71% ug 52.13% sa Abril. Tungod kini sa mas gamay nga biyahe, mas maayong routing, ug mas hugot nga pagmonitor sa mga sakyanan. Ang gasolina usab mikunhod, gikan sa 3% hangtod 15% nga pagsaka sa Marso ngadto sa 7% hangtod 8% nga pagkunhod sa Abril.
Sa kinatibuk-an, nakatigom ang dakbayan og ₱5,319.01 nga savings sa panahon sa Abril 11 hangtod 17. Bisan pa niini, adunay gihapon mga building sama sa Finance/ABC Building nga nakasinati og kakulang sa efficiency ug adunay net loss nga ₱3,576.63.
Gipunting sa report nga daghang natigom nga savings ang resulta sa espesyal nga kahimtangan sama sa pagkunhod sa operasyon panahon sa holidays, ug dili pa tungod sa permanente nga polisiya. Nakit-an usab ang kakulangan sa pagsunod sa ubang opisina, lakip ang dili consistent nga paggamit sa air-conditioning, suga, ug pagdumala sa tubig.
Girekomendar sa Department of General Services ang mas hugot nga implementasyon sa conservation measures sama sa schedule sa pagpalong sa air-conditioning, regulasyon sa oras sa suga, ug mas estriktong pagmonitor sa mga sakyanan ug pasilidad sa gobyerno.
Matud sa mga opisyal sa siyudad, gamiton ang maong findings isip giya sa umaabot nga mga lakang aron mapalambo ang mas episyente, makatipid, ug malungtarong operasyon sa gobyerno.
Source: Cebu City PIO
I via Renante Socia Lada