Usa ka trahedya ang nahitabo sa lungsod sa Tabuelan human napalgan ug nalumos ang usa ka inahan nga miadto unta aron mopalit og gatas alang sa iyang anak.
Ang biktima giila sa Tabuelan MPS nga mao si Susan Arellano, 49 anyos ug minyo, residente sa Sitio Abante, Barangay Bongon, nadiskubrehan nga patay duol sa Batawang Bridge, Sitio Tapon, Barangay Tabunok, niadtong alas 8:00 sa buntag sa Huwebes, Pebrero 12, 2026.
Sumala sa kapulisan, ang lawas sa biktima nadiskubrehan ni Jerry Ortiz Dela Raya, 36 anyos, usa ka truck driver gikan sa Salvacion Subdivision, Victorias, Negros Occidental. Dali niya nga mitaho ang mga residente, kinsa mipahibalo sa Tabuelan Municipal Police Station aron masugdan ang imbestigasyon.
Matud sa imbestigasyon, nilakaw ang biktima paingon sa tindahan pagkahuman nananghid sa iyang bana nga mopalit og gatas para sa ilang gagmayng anak. Gipasabot sa pamilya nga gipahatod ra ang gatas sa driver sa traysikol, apan wala na makapauli ang inahan sukad niadtong adlawa. Pagka-Huwebes sa buntag, nadawat nila ang balita sa iyang pagkamatay.
Padayon ang kapulisan sa pagtino sa tukmang hinungdan sa insidente, samtang gidala sa otoridad ang lawas sa biktima alang sa dugang eksaminasyon.
Source: Tabuelan MPS
I via Renante Socia Lada