Nasikop sa kusog nga hot pursuit operation sa kapulisan ang usa ka notadong kawatan og motorsiklo sa lungsod sa Dalaguete, Cebu, sa niaging adlaw. Ang operasyon gipangulohan mismo ni Police Major Alejandro P. Batobalonos, hepe sa Dalaguete Municipal Police Station.
Ang suspetsado, usa ka 20 anyos nga lalaki nga taga-Barangay Balud, dugay nang gisubay sa mga otoridad tungod sa sunod-sunod nga pagpangawat og motorsiklo sa lungsod ug mga kasikbit nga lugar.
Usa sa narekober sa operasyon mao ang itom nga Suzuki Raider nga gipanag-iya ni Shan Reed, usa ka trabahante sa Prince nga nagpuyo sa Barangay Banhigan, Dalaguete. Giila kini sa biktima nga mao gyud ang iyang motorsiklo nga nawala niadtong miaging mga adlaw.
Gipadayon karon sa Dalaguete PNP ang imbestigasyon aron masuta kung adunay uban pa nga biktima ug kung adunay mga kauban sa krimen ang suspetsado. Giawhag usab ang publiko nga dunay reklamo sa kaparehong kaso nga motaho dayon sa ilang buhatan.
I via Renante Socia Lada