Nasikop sa kapulisan sa Sawang Calero Police Station ang usa ka nailhang high-value individual (HVI) nga drug personality sa Dakbayan sa Sugbo atol sa gipahigayon nga buy-bust operasyon, kagabii, Marso 24, 2025. Ang operasyon gipangulohan ni PCapt. Giann Carlo Reyes kagabii.
Ang suspetsado nailhan nga si Raymond Gocotano Rosal, 43 anyos, usa ka technician, ug residente sa Barangay Lahug, Cebu City.
Sa maong operasyon, nasakmit gikan sa suspek ang 400 gramos sa gituohang shabu nga mokabat sa P2.72 milyon, ug armas de fuego.
Matod pa sa mga awtoridad, si Rosal nadakpan na kaniadtong 2016 tungod sa pagsupak sa balaod sa ginadiling drugas, apan nakagawas siya niadtong 2019.
Karon, giandam na ang mga kasong kriminal batok kang Rosal, lakip na ang paglapas sa RA 9165 (Comprehensive Dangerous Drugs Act), RA 10591 (Illegal Possession of Firearms), ug Comelec Gun Ban (Resolution 11067). (Renante Socia Lada)