Padayon ang imbestigasyon sa Talisay City Police Station sa pagpamusil nga mipatay sa usa ka habal-habal driver sa Purok Sampaguita, Barangay San Roque, niadtong Pebrero 4 sa buntag, samtang wala pa gihapon mailhi ang suspek nga giingong sakay og bisikleta.
Ang biktima giila nga si Ryan Libradilla, hamtong na ug residente sa Purok Lumboy sa maong barangay. Matod sa kapulisan, nadala pa siya sa Cebu City Medical Center apan gideklarar nga dead on arrival tungod sa samad nga iyang naangkon.
Sumala ni Patrolman Raffy Rempojo, imbestigador sa Talisay City Police Station, gi-backtrack na ang mga posibleng agianan sa suspek ug gipangita ang bisan unsang ebidensiya nga makatabang sa pag-ila sa gunman. Bisan pa niini, wala pa’y natumbok nga person of interest.
Gikompirmar sa kapulisan nga drug user ang biktima, apan wala pa matino kung ang ilegal nga drogas ba ang motibo sa pagpatay. Giingon usab nga bag-ong drug personality kuno ang biktima base sa pipila ka impormasyon, apan wala pa kini mapamatud-an.
Naglisod ang kapulisan sa pagkuha og dugang detalye tungod kay daghang residente ang milimod nga nakakita sa insidente. Bisan pa niini, padayon ang panawagan sa kapulisan sa publiko nga motabang ug maghatag og impormasyon aron mapaspasan ang pagdakop sa responsable ug mapadayon ang kaluwasan sa komunidad.
I via Renante Socia Lada