Mipirma og kasabutan ang Cebu Provincial Government uban sa Cebu Normal University ug Vicente Sotto Memorial Medical Center (CNU-VSMMC College of Medicine) aron maghatag og scholarship sa mga kabatan-onang Cebuano nga gustong mahimong doktor ug andam mo-alagad sa komunidad.
Gipasabot ni Gov. Pamela Baricuatro nga ang pagpili sa mga scholar gitugyan gyud sa eskwelahan. Wala siyay labot sa pag-screen sa mga aplikante, ug wala usab labot ang ubang politiko. Sumala niya, ang probinsya motabang lang sa pondo sa scholarship, apan ang pagdawat sa estudyante responsibilidad sa kolehiyo aron malikayan ang politika sa proseso.
Ang maong programa gituyo aron masiguro nga magpadayon ang suplay sa mga doktor sa 16 ka ospital nga gipadagan sa probinsya—upat ka provincial hospitals ug 12 ka district hospitals. Ubos sa kasabutan nga gipirmahan sa Capitol, Department of Health Central Visayas ug CNU-VSMMC College of Medicine, bayran sa probinsya ang tuition sa mga kwalipikadong estudyante bugti sa return-of-service.
Human mahimong lisensyadong doktor, ang mga scholar kinahanglan mo-alagad sa mga ospital sa probinsya o ubang government health facilities sulod sa panahon nga doble sa ilang gidugayon sa scholarship. Pananglitan, kung upat ka tuig ang scholarship, walo ka tuig silang magserbisyo sa probinsya.
Ang CNU-VSMMC College of Medicine mao ra ang state-funded medical school sa Cebu, busa mas ubos ang tuition kumpara sa pribadong eskwelahan. Tungod kay mikunhod ang scholarship slots gikan sa nasyonal nga programa ilalom sa Doktor Para sa Bayan Act, ang Capitol maoy mosalo sa pondo sa uban pang estudyante. Naglaum ang mga opisyal nga kung makapahuman og 50 ka doktor matag tuig, dako kini’g tabang aron dili na maglisod og pangita og doktor ang probinsya sa umaabot.
Source: Cebu Province PIO
I via Renante Socia Lada