Usa ka sunog ang miulbo sa Sitio San Vicente Ferrer, Barangay Lahug, niadtong Huwebes, Pebrero 26, nga naka ugdaw sa daghang kabalayan.
Ang hinungdan sa maong sunog gituohang usa ka kandila nga nalimtan ug pawong sa panimalay sa usa ka residente. Sumala sa imbestigasyon sa Cebu City Fire Station, misaka sa ikaduhang alarma ang sunog alas 6:57 sa gabii ug napalong na kini alas 9:41.
Kapin sa 40 ka balay ang naugdaw, 1O usab ka balay ang nakan-an sa kalayo nga maoy nakaapekto sa kapin 70 ka pamilya.
Matod sa mga silingan, ang tag-iya sa balay diin nagsugod ang sunog, naggamit ug kandila tungod kay walay kuryente, apan nalimtan kini ug pawong. Adunay mga pasangil nga ang tagbalay ug iyang kapikas nagduwa pa kuno sa gawas sa ilang balay sa wala pa mahitabo ang sunog, hinungdan nga wala nila mabantayan ang kandila nga nakaingon sa kadaot.
Walay namatay o naangol sa insidente, apan dako ang kadaot nga nahitabo sa mga apektadong pamilya. Diin niabot ngadto sa P1.2 milyon ang danyos niini. Dugang imbestigasyon ang gihimo sa mga awtoridad aron masuta ang hinungdan sa maong sunog. (Renante Socia Lada)