Usa ka kanhi piniriso ang patay diha-diha dayon human gipusil sa wala mailhing lalaki samtang nagkaon pasado alas 2:05 sa kadlawon Enero 23, 2026 sa Sitio Huyong-huyong, Barangay Mambaling, Cebu City.
Giila sa kapulisan ang biktima nga si Jason Lendio Yuson, 31 anyos, ulitawo ug residente sa maong lugar. Matod pa sa mga saksi, ang suspek nagsul-ob og itom nga hoody jacket ug maong pants, ug armado og kalibre .45 nga armas.
Base sa inisyal nga imbestigasyon sa Mambaling Police Station, kalit lang mitungha ang suspek gikan sa luyo sa biktima ug mipusil makaduha ka higayon samtang kini nagkaon.
Naigo sa bala ang dughan ug tuo nga hawak sa biktima nga maoy hinungdan sa iyang kalit nga kamatayon. Dugang nasayran sa kapulisan nga bag-o pa lang nakagawas sa prisohan ang biktima human nakapahimulos sa plea bargain tungod sa kasong may kalabutan sa ginadiling drogas.
Nagpadayon karon ang kapulisan sa ilang hot pursuit operation aron maila ug madakpan ang suspek, lakip na ang pag-imbestigar sa posible nga motibo sa nahitabong pamusil.
📸 CTTO
I via Renante Socia Lada
