Ning panahon sa ting ulan ug pagsulod sa La Niña gipangandaman na daan sa Cebu City Disaster Risk Reduction and Management Office (CCDRRMO).
Si Harold Alcontin, pangulo sa CCDRRMO, nibutyag nga nangandam na sila daan ning panahon sa ting ulan subay sa pahimangno sa Philippine Atmospheric, Geophysical, and Astronomical Services Administration (PAG-ASA).
“El Niño pa ato na nang gibutang daan (ang signages), unya kani atong water level ‘gauges’, kanang naa sa mga kasapaan nga naa mamonitor nato pirmi nisaka na ba ang tubig sa sapa. Every bridges makit-an ninyo naa nay mga level gauges,” matod ni Alcontin.
“So, mao nay bantayan sa atong barangay-based responders, kung nisaka na ang (tubig sa) sapa. Anha ta diha kung kinahanglan ba og preemptive evacuation or total evacuation gyud,” dugang niya.
Gihimo usab ang mga rekoreda ug education campaign para adunay igung kasayuran ug kahibalo ang katawhan kung adunay pagbaha ug pagdahili sa yuta.
Gipangandaman na usab karon ang mga barangay nga daling bahaon ug posibling adunay pagdahili sa yuta, gi plastar na usab ang mga ekipo para dali ra kining ma respondihan kung adunay emerhensya na mutumaw. (Renante Socia Lada)
(Source: Cebu City PIO)